اسكندريه

يا موجه شايفك من بعيد جايه

مرة عاليه و مرة هايجه ومرة ماشية بحنيه

سألتها جايبه معاكي ايه في المرة ديه

ردت وقالت مانت عارف يوم على ديه ويوم على ديه

عجميستا وشط العجمي

فيلم عجميستا
فيلم غريب ما يدخلش سينما
فيلم بيحكي عن ايه ما تعرفشي
فيلم لولا انه بيتعرض الايام دي على سينما كتير ما كانش الواحد اتفرج عليه
وبالرغم من ان الواحد ما يتفرجشي عليه اكتر من مرة واحده كحب استطلاع
لان من اسمه متهيألي كده ما حدش فكر يدخله سينما
الفيلم فعلا حاولت ادور له على قصه ومغذى ما لاقيتش
المهم
الفيلم ده كل لما بصادف انه اشوفه بيبتدي اقعد اتفرج عليه
فراغ ممكن
ما عنديش دش اتفرج على حاجه تانيه ممكن
:)
حنين لاسكندرية
ده بقي اللي اكيد
........
الفيلم فيه شويه مناظر متاخده بجد حلوة جدا
القعده اللي في الشاليه لما كانوا بيشووا وعاملين باربيكيو
بعد كده لما كانو بيشربوا الشاي وبيسمعوا ام كلثوم ومحمد فؤاد
بجد الحته دي جامده جدا
حسستني اني في مصيف بجد واني عايش معاهم في الشاليه
ياااااااااااه
الحاجه التانيه اللي في الفيلم اللي من الاخر بتحكي القصه كلها بتاعته وممكن كنا نبدل الفيلم بيها
هي الاغنية
الاغنيه فعلا كلماتها حلوة جدا والخلفية الموسيقيه بتاعتها جميلة جدا
وبقت حلوة اكتر لما اتنين غنوها مع بعض
عبرت عن اللي عايز يتقال في الفيلم
الاغنية فعلا بعيدا عن الفيلم بتحكي واقع شباب كتير دلوقتي فينا
عايشين ومش محددين ايه الهدف من حياتنا ولا احنا عايزين ايه بالظبط
ويمكن هيا فعلا لخصت قصه الفيلم في صوتين وفي شخصين من البشر

عمري ايه قبل الليلادى
عمر ضايع عمر فاضي
واللي عشته من حياتي ورقه فاضيه وقلم
واللي كانت روحي فيها كدبتنى ليه عنيها
فجأة راحت مش لاقيها زى حلم أتهدم


جوه منى كتير معاني والحياة مكتفانى
أنا نفسي أقول واصرخ بصوت
نفسي اتحدي زماني
أحلام كتير متكسرة بين السنين متنطورة
نفسي ألاقى فيا نفسي
نفسي يتحقق كياني
...

أما انا فاحكايتي قصه
من هروب لهروب ولسه
لسه بحلم يوم بمرسى
ومركبة وحضن وصبيه
بين حياة شايفها سد
مش مهمة لأي حد
نفسي أعيش بس انى أعيش
والا يبقى كتير عليا


جوه منى كتير معاني والحياة مكتفانى
أنا نفسي أقول واصرخ بصوت
نفسي اتحدي زماني
أحلام كتير متكسرة بين السنين متنطورة
نفسي ألاقى فيا نفسي
نفسي يتحقق كياني
...

الصورة دي بقي فعلا قعده اسكندراني .....بس بلاش سيجارة الحشيش اللي فيها

يا طير

فارد جناحك يا طير وعالي لفوق

لوحدك اخدت السما

والبحر وهواها

وطاير على شطها

طاير على شطها يا طير

بتحبها؟

اكيد طبعا يا طير

من غير ما تقول عارف وحاسس بيك

ومين يا طير شافها ولا حبهاش

ده اللي يجيلها مرة مش عايز يسيب

بالك بقى باللي بالك فيه

باللي عايش ودايس وشامم ريح الموج

شاممه يا طير

املى صدرك بيه

عجبي عليك يا طير

لااااابد هناك

عند المرسي والمنشية ومش هاين عليك رملها

عاجبك ميناهها الشرقي ومش عايز تسيبه

اومال يا طير لو شوفتها من جوه هناك بعيد عن بحرها

عند الناس الطيبة

ناسها يا طير غير أي ناس

مجدعة وشهامه وحفظ جميل

هاخدك يا طير مرة ونروح هناك

يمكن تجيبه بحرها معاك عندهم

ولا اقولك

بلاش تتعبه

هو لوحده عايش وساكن قلبهم

أمانه عليك يا طير ما تسيب جوها

امانه عليك يا طير ما تغير طبعها

الا هيا يا طير

دي هيا اللي ساكنه في قلبنا

ازعل واموت يا طير
لو حد مسها

خلاص يا طير

ماشي انا ومسافر بس راجعلها

راجع يا طير وشايل في قلبي حبها

راجعلها انا يا طير

ان شاء الله هارجعلها

هاحضنها بعنيا

وابوس ترابها واقولها

وحشتيني

"إهداء لست الكل حبيبة قلبي أمي"